Duqeyn khasaare dhimasho iyo dhaawac ah geysatay oo ka dhacday magaalada Muqdisho

Inta la xaqiijiyay 7 ruux ayaa geeriyootay, 14 ruux oo kalena dhaawacyo kala duwan ayaa soo gaartay kaddib markii ay maanta gelinkii dambe ay duqeyn ka dhacday magaalada Muqdisho.

Duqeynta oo inta badan ay geysteen Ciidamada Amisom ayaa waxay timid kaddib markii ay kooxaha ka soo horjeeda dowladda Soomaaliya ay madaafiic ku tuureen fariisimada ay Ciidamada Dowladda Soomaaliya iyo kuwa Amisom ay ku leeyihiin magaalada Muqdisho.

Goobaha ay dadka ku dhinteen kuna dhaawacmeen ayaa waxay intooda badan ka tirsan yihiin Degmooyinka Hodan iyo Dayniile, kuwaasi oo ay ku dhaceen madaafiic aad u faro badan oo ka soo dhacayay dhinaca fariisimada Ciidamada Amisom.

Waxaa dhici karta in khasaaraha uu inta hadda soo baxday ka badan yahay, hayeeshee wixii warar ah ee ku soo kordha duqeynta ka dhacday magaalada Muqdisho waxaad kula socon doontaan wararkeena dambe haddii alle idmo

Qorshihii Maamul Goboleedka Koofur Galbeed Soomaaliya oo la dhameystiray iyo Dowladda Ethiopia oo ku lug leh.

Shir xasaasi ah oo maalmahan uga socday Deegaanka Doolow ee xuduuda Ethiopia Xildhibaano ka tirsan Baarlamaanka iyo Siyaasiyiin ayaa lagu dhameystiray qorshe Maamul Goboleed loogu sameynayo Gobolada ku yaala Koofur Galbeed Soomaaliya, oo intooda badan ay gacanta ku hayaan Kooxaha Islaamiyiinta.

Wararka ayaa sheegaya in shirkaas lagu yagleelay aas aaska Maamul Goboleed uu yeesho ilaa Lix Gobol oo kala ah, Gedo, Bay, Bakool, Shabellaha Hoose, iyo Jubooyinka, iyadoo ragga ku shiray Doolow ay gaarayeen ilaa Labo boqol oo ka soo jeeda Goboladaas.

Siyaasiyiinta ku lug lahaa qorshahaa ayaa ka heshiiyay sidii loo mideyn lahaa Goboladaas, isla markaana looga xureyn lahaa Al-Shabaab oo gacanta ku heysa, waxaana ay diyaariyeen Ciidamo fara badan oo ka qeyb qaata la wareegitaanka deegaanadaas.

Aadan Saransoor oo ka mid ahaa Saraakiishii Maamuladii Bay iyo Bakool ee la eryay ayaa sheegay in kulankaas lagu gorfeeyay sidii loo mideyn lahaa Gobolada Koofur Galbeed, isla markaana Maamul Goboleed loogu dhisi lahaa, waxaana uu cadeeyay in kulankaas ka qeyb galeen Xildhibaano ka tirsan Baarlamaanka oo ay ka mid yihiin Col. Barre Hiiraale, C/llaahi Sheekh Cismaaciil iyo Maxamuud Sayid Aadan oo ka soo jeeda Goboladaas.

“Qorshaha Maamul Goboleedka Koonfur Galbeed Soomaaliya meel wanaagsan ayay mareysaa, waxaan la rajeynaynaa in doorashada Madaxweynaha lagu qabto gudaha Goboladaas, marka aanu xoreyno”ayuu yiri Aadan Saransoor oo intaa ku daray in ay heystaan Ciidamo fara badan oo dhowaan tababar u sameeyeen

Waxaa uu sheegay in shirka uu yahay mid aas aas u ah dhismaha Maamul goboleedka Koofur Galbeed, hase ahaatee ay jiraan qorshayaal kale oo Gudiyo qaban qaabo loogu sameeyay sidii ay u guda geli lahaayeen dhismaha Maamul goboleedka.

Dowladda Ethiopia ayaa la rumeysan yahay in ay qorshahan dabada ka riixeyso, iyadoo horay saanado milateri ugu deeqday Siyaasiyiintan oo ka mid ah hogaamiye kooxeedyadii dalka, isla markaana ay gacan saar u la leedahay, waxaana ay quudareyneysaa Itoobiya in meesha laga saaro awooda Kooxaha Islaamiyiinta.

Lama garanayo sida ay arrintani wax uga qaban doonaan ama ay ugu hirgeli doonto Maamul Goboleedkani maadaama la wada ogsoon yahay in ay Gobolada ay sheegayaan oo dhan gacanta ugu jirto kooxaha mucaaradka ah ee dowladda ka soo horjeeda

Golaha amaanka ee Qaramada Midoobay oo u codeeyay qaraar lagu cunaqabateynayo dowladda Eritrea kadib markii lagu eedeeyay in ay hurinayso rabsadaha Soomaaliya

Golaha amaanka ee Qaramada Midoobay ayaa cunaqabateyn ku soo rogay dalka Eritrea kadib markii lagu eedeeyay in ay hurinayso rabsadaha Soomaaliya iyo gobolka geeska Africa.

 15-ka xubnood ee golaha amaanka ee Qaramada Midoobay ayaa u codeeyay qaraar ka dhan ah dowladda Eritrea kaasoo safarada looga mamnuucayo Masuuliyiin ka tirsan dowladda Eritrea isamarkaana lagu xayirayo hanti ay leeyihiin shaqsiyaad iyo shirkado u qoran oo u diiwaan gashan gudiga Qaramada Midoobay u qaabilsan arimaha cunaqabateynta.

 Qaraarkan ay ansixiyeen golaha amaanka ee Qaramada Midoobay oo ay soo jaadiyeen wadamo ay ka mid yihiin Uganda iyo Shiinaha ayaa ku salaysnaa eedeymo loo soo jeediyay dowladda Eritrea oo ku saabsanaa in ay taageerto dhinacyada ka horjeeda dowladda KMG  ee Soomaaliya,muran xaduudeedka kala dhaxeeya dowladda Jabuuti iyo arimo kale oo ku saabsan amniga gobolka Geeska Africa.

 Dowladda Liibiya oo ah hogaamiyaha Midowga Africa ee sanadkaan ayaa ah dowladda kali ah ee diiday codeyntii laga dhiibanayay in Eritrea cunaqabeynta loo saaro sababo la xariiri in ay faragalin ku heyso dalka Soomaaliya.

 Dowladda Eritrea ayaa horay dhowr mar u beenisay eedeymaha loo soo jeediyay ee ah inay taageero siiso dhinacyada ka soo horjeeda dowladda KMG iyo in ay qasayso amniga gobolka Geeska Africa.

 Bishii ocosta ee la soo dhaafay ayay aheeyd markii xoghayaha amuuraha dibadda ee Maraykanka Helary Cilinton ay ugu baaqday Eritrea in ay joojiso wax ay ugu yeertay hubeynta iyo fangerynta dhinacyada ka horjeeda dowladda KMG ee Soomaaliya.

Qoysas ka soo barakacay deegaano ka tirsan maamul goboleedka Puntland oo maanta gaaray degmada Xudur ee Gobolka Bakool

Qoysas kasoo jeeda Gobollada Bay iyo Bakool oo ka soo barakacay degmada Gaalkacyo ee Gobolka Mudug ee ay maamusho Puntland ayaa maanta gaaray degmada Xudur ee xarunta Gobolka Bakool.
 
Qoysaskan oo ay wadeen in ka badan 10-baabuur oo nooca waaweyn ah ayaa dib ugu laabtay deegaannadooda, iyagoo sheegay inay kasoo carareen deegaannadaas Puntland oo dhibaatooyin loogu geystay.
 
“Waan kasoo cararnay deegaankii aan ku noolayn ee Puntland, waxaana kusoo laabanay deegaankeenna, waana caafimaad qabanaa” ayuu yiri ruux ka mid ah dadkii soo barokacay oo warbaahinta uga warbixiyay barokacooda.

Dadkan waxay sheegeen inay ahaayeen ganacsato hanti ku lahaa Gaalkacyo balse ay la kulmeen dhibaatooyin faro badan oo kaga imaanayay dadkii ay la noolaayeen muddada dheer lagana burburiyay goobahoodii ganacsi.
 
Malaaq Cali Muumin oo ka mid ah waxgaradka Gobolka Bakool ayaa hay’adaha gargaarka uga dalbaday dadkan dib ugu soo laabtay deegaannadooda inay gargaar deg-deg ah la soo gaaraan, isagoo sheegay inay yihiin dad aan waxba wadan.
 
“Hay’adaha gargaarka ee ku sugan gobolka waxaan ka codsanaynaa inay gargaaraan dadkan kasoo barokacay Punland, sidoo kalena dadka ALLE uu wax siiyay waa inay iyaguna dadkan gargaaraan” ayuu yiri Malaaq Cali Muumin.

Maamulka Puntland, gaar ahaan midka Gobolka Mudug ayaa dhawaan ku wargeliyay dadka kasoo-jeeda Gobollada Koonfureed ee Soomaaliya inay ka baxaan deegaannada ay ka taliyaan, iyagoo ku eedeeyay inay lug ku leeyihiin falal amni darro ah oo dhawaanahan ka dhacay deegaanno ka tirsan Puntland.

Barlamanka KMG oo sedax bil kadib maanta kulankii 10 aad ku yeeshay Xarunta Maamulka gobolka Banaadir ee Magaalada Muqdisho

Kalfadhigii 10 aad ee Barlamanka KMG ee Soomaaliya oo ay soo xaadireen in ka badan 280 xubnood ayaa mudo sedax bilood kadib maanta Magaalada MUqdisho dib uga furmay.

 Fadhigaan maanta Barlamanka ay ku yeesheen Magaalada Muqdisho ayaa waxaa ka soo qeyb galay Madaxweynaha dowladda KMG ee Soomaaliya Sheekh Shariif Sheekh Axmed iyo Masuuliyiin kale.

Kal fadhiga ayaa markii uu furmay waxaa halkaasi ka hadlay gudoomiyaha Barlamanka KMG ee Soomaaliya Sheekh Aadan Max’ed Nuur Madoobe waxaana uu sheegay in Barlamanku intii ay ku sugnaayeen Magaalada muqdisho ay soo wajahday dhibaatooyin adag oo dhanka Maaliyadda ah isagoona xusay in sanadkaan 2009-ka golaha Barlamanka ay mushaar ka qaateen 4 bilood oo kali ah.

Sidoo kale madaxweynaha dowladda KMG Sheekh Shariif Sheekh Axmed oo isna halkaasi ka hadlay ayaa qiray in ay jirto mushaar la’aanta heysata gobolaha Barlamanka KMG ee Soomaaliya,waxaana uu sheegay in dowladda KMG ay heshay balan qaadyo aad u badan hase ahaatee ay ka heshay balan qadyadaasi sedax milyan oo kali ah taasoo uu sheegay in aan waxba lagu qaban Karin.

Waxaa uu ugu baaqay Barlamanka dowladda KMG in ay noqdaan kuwa isku duuban si ay u samata bixiyaan umadda Soomaaliyeed ee haatan dhibaatada xoogan ay ku habsatay.

 Ugu dambeyntii kalfadhigii Maanta Barlamanka KMG ay ku yeesheen Magaalada ayaa waxaa uu ku soo xirmay halkaasi iyadoo gudoomiyaha Barlamanka uu ku wargliyay xubnaha Barlamanka in ay horyaalaan muushino aad u farabadan oo uu tilmaamay in la doonayo in wax looga qabto dhibaatada dalka ka taagan.

 Muushinadaasi ayaa waxaa uu ka tilmaamay in ay ka mid yihiin la xisaabtan la doonayo in lagu sameeyo xukuumadda KMG ee Soomaaliya waxaana uu tilmaamay in marka labaad ee la isugu soo laabanayo ay soo wargalinayaan golaha Barlamanka.

 Fadhigii kan ka horeeyay ee Barlamanka KMG ee Soomaaliya ay ku yeeshaan Magaalada Muqdisho ayaa waxaa uu ahaa kii ay ku ansixiyeen in wadanka lagu soo rogo xaalad deg deg ah mudo sedax bilood ah

Dagaalo xoogan oo Galabta ka dhacay agagaarka Asluubta ee Magaalada Muqdisho iyo Xarakada Mujaahidiinta Al Shabaab oo guulo ka sheegtay dagaalka

Dagaalo xoogan ayaa Galabta ciidamada dowladda KMG iyo Xarakada Mujaahidiinta Al Shabaab waxa ay ku dhaxmareen agagaarka Xeradii Asluubta ee Magaalada Muqdisho iyadoona dagaalkaasi ay guulo ka sheegteen Xarakada Mujaahidinta Al Shabaab.

Dagaalka oo u dhaxeeyay ciidamada dowladda KMG iyo kuwa AMISOM oo isku dhan ah iyo Xarakada Mujaahidiinta Al Shabaab ayaa galabta Salaadii Casar kadib waxaa uu ka dhacay inta u dhaxeysa deegaanka Sarkuusta iyo Xaruntii ciidanka Asluubta ee duleedka koofureed ee Magalada Muqdisho.

Dagaalka ayaa bilowday kadib markii Saraakiil katirsan Xarakada Mujaahidiinta Al Shabaab ay sheegeen in ay weerar ku qaadeen goobo ay kaga sugnaayeen ciidamada dowladda deegaanka Sarkuusta ee duleedka magaalada Muqdisho, waxaana xiligaasi kadib uu dagalku noqday mid balaaran oo labada dhinac ay isweydaarsadeen hubka nuucyadiisa kala duwan.   Saraakiil katirsan Xarakada Mujaahidiinta Al Shabaab oo la hadlayay Shabelle ayaa waxa ay sheegeen in dagaalkaasi ay guulo ka gaareen islamarkaana ay halkaasi ku dileen ilaa 7-Askari oo ay sida ay sheegeen ay Saraakiil ku jireen.   Dhinaca kale xiiro kala duwan oo aynu la sameynay dhanka dowladda KMG Soomaaliya si aan waxbadan uga ogaano dagaalka ayaysan inoo suuro galin in aan qadka taleefoonka ku helno.

Dagaalkii galabta ayaa waxaa la isku adeegsaday qoryaha garbaha laga rado, waxaana la sheegay in ciidamada AMISOM ay kaga qeyb qaateen dagaalka Madaafiic culus kuwaasi oo qaarkood dadka deegaanku ay sheegeen in ay ku dhaceen agagaarka deegaanka Garisbaalay oo ah meel ay deganyihiin dadkii barakacayaasha ee ka cararay dagaalada Muqdisho inkastoo aan la sheegin qasaare ka dhashay madaafiicdaasi.

Inta la ogyahay dagaalka ayaa waxaa ku dhaawacmay labo qofood oo haween ah kuwaasi oo la sheegay in rasaas ay ku haleeshay wadada dhinaceeda xili ay ka agdhawaayeen goobta lagu dagaalamayay.   Waxaa hakad galay intii uu dagaalka socday isku socodka dadka iyo gaadiidka ee wadada dheer ee Xariirisa Muqdisho iyo Afgooye iyadoo sidoo kalena dagaalku uu saameeyey ganacsigii ka jiray nawaaxiga halka uu dagaalku ka dhacay sida uu sheegay mid ka mid ah dadka deegaanka oo Shabelle la hadlay xiligii uu dagaalka galabta socday.

Xaaladda ayaa haatan waxaa ay tahay mid degen, waxaana dagaalku marka uu istaagay daqiiqado kadib dib u soo laabtay isku socodka dadka iyo gaadiidka iyadoo ganacsigiina uu dib u bilowday kadib markii ay in mudo ah albaabada u laabnaayeen.

Gudoomiyihii Arlaadi Somali Community in Manchester oo Xilkii uu isaga tagey Kana Guurey magaalada Manchester UK

Gudoomiyihii   Arlaadi Somali  Community in Manchester  oo Xilkii uu isaga tagey  Kana Guurey magaalada Manchester UK

 Warar hogagaal ah   oo aan ka halney qaarka ka tirsan  Arlaadi community in Manchester  ayaa waxay sheegayaan in uu magaalada ka guurey gudoomiyhii arlaadi Somali community in Manchester  uuna gudoomiya ka ahaa ilaa  2001/2009

Wararka naga soo gaaraya Manchester waxay sheegayaan in dhawaan la dooran doono gudoomiya usub oo ay yeelato arlaadi Somali community in Manchester

Magaalada Manchester ayaa ah maasha ay si aad ah ugu badan yihiin dadka ka soo jeeda south Somali

Ciidamo Ethiopian ah oo watta gaadiid dagaal oo aad u badan oo soo buux dhaafiyay isgoyska Kalabeyr deegaanka Jawiil ee gobolka Hiiraan

Ciidamo Ethiopian ah oo watta gaadiid dagaal oo aad u badan ayaa soo buux dhaafiyay isgoyska Kalabeyr deegaanka Jawiil ee gobolka Hiiraan.

Cutubyo ka tirsan Ciidmada Militariga Ethiopia islamarkaana watta gaadiidka dagaalka ayaa aroornimadii hore ee saaka waxa ay soo buuxdhaafiyeen Isgoyska Kalabeyrka deegaanka Jawiil ee gobolka Hiiraan.

Wararka laga helayo Isgoyska Kalabeer ayaa waxa ay sheegayaan in Ciidamadan Ethiopianka ah ay wataan ku dhawaad 15-gaari iyadoo ciiadamaduna la sheegayo in ay gaarayaan boqolaal Askari.

Waxaa Ciidamadan Ethiopianka ah la xaqiijiyay in ay ka soo talaabeen degmada Feer Feer dhulka Soomaalida ee Ethiopia ay maamusho iyo deegaanada kale, waxaana Ciidamadan Ethiopianka markii ay soo gaareen Isgoyska Kalabeyr deegaanka Jawiil ee gobolka Hiiraan ay isku fidiyeen wadada Laamiga ah iyagoona fariisimo culus ka sameystay Wadadaasi Laamiga ah iyo buuraha ku teedsan.

Lama oga rasmi ahaan Ujeedada dhabta ah ee ka danbeysa imaanshiyaha Ciidamadan Ethiopianka Isgoyska Kalabeyr deegaanka Jawiil ee gobolka Hiiraan oo Waqooyiga bari ka xiga wax ka yar 30-KM magaalada Baladweyne ee xarunta gobolka Hiiraan, waxaana Ciidamadan Ethiopianka wararku ay sheegayaan in ay wehliyaan mas’uuliyiin katirsanaa maamuladii hore ee dowladda KMG ee ka arimin jiray gobolka Hiiran iyo Ciidamo tiro yar oo la socda.

Ilaa iyo iminka ma aysan ka hadlin Saraakiishaasi la socota Ciidamdan Ethiopianka Ujeedada ay halkaasi u yimaadeen iyadoo maamulka Uurka Xisbul Islaam ee gacanta ku haya magaalada Baladweyne ilaa iyo iminka iyaguna aanay ka hadlin imaanshiyaha Ciidamadan Ethiopianka ah Isgoyska Kalabeer oo mudo 2-bil ka hor ay isaga guureen iyadoo Ciidamadan Ethiopianka mudo 5-bil ku dhow ay fariisin ku lahaayeen Isgoyska Kalabeer deegaanka Jawiil ee gobolka Hiiraan.

Dowladda Kenya oo xiratay xadka ay la wadaagto Soomaaliya

Sabti, December 19, 2009 Dowladda Kenya ayaa shalay xiratay 600Km oo ku aaddan xadka ay la wadaagto Soomaaliya, iyadoo tallaabadaasna ku sheegtay mid ay uga hortegeyso in ay gudaha dalka Kenya u soo gudbaan dad ka socda dalka Soomaaliya.

Wasiirka Ammaanka gudaha ee Kenya Prof. George Saitoti ayaa tilmaamay in dowladdiisa ay si weyn u adkeyneyso ammaankeeda, wuxuuna carrabka ku dhuftay in tallaabada ay qaadeen ay tahay mid ay uga hortegayaan in dad ka tirsan Al-Shabaab iyo Xisbul Islaam ay u tallaabaan dhinaca dalka Kenya iyagoo buu yiri iska dhigaya dad qaxooti ah.

Dowladda Kenya ayaa sidan oo kale waxa ay xiratay xadka ay la wadaago Soomaaliya sanadkii 2007, xiligaas oo ay dalka Soomaaliya ka socdeen dagaallo u dhaxeeyay Ciidamo Itoobiyaan ah oo gacan-siinayay Dowladdii uu Madaxweynaha ka ahaa C/llaahi Yuusuf Axmed iyo Xoogag hubeysan oo ka soo horjeeday.

Hadalka Wasiirka Amniga gudaha Kenya ayaa wuxuu ku soo beegmayaa iyadoo dhawaan ay ciidamada ammaanka Kenya, gaar ahaan kuwa gobolka xeebta  ay qabqabteen dad  badan oo Soomaali ah oo si sharci darro ah ku soo gelayay Kenya, kuwaasi oo ay ku jireen kuwo lagu soo oogay dacwad ah in ay hub sharci darr ah wateen, ayna doonayeen in ay falal burcadnimo ah geystaan.

Si kastaba arrintu ha ahaatee tallaabada ay qaadday dowladda Kenya ee ay xadkeeda ku xiratay ayaa waxay caqabad ku noqoneysaa dad badan oo Soomaali ah oo si magangalyo-doon ah u soo gala dalka Kenya, kuwaasi oo ka soo carara dagaallada mudada dheer ka socda Soomaaliya.

Dagaal ka dhacay Deegaanka Wabxo ee Gobolka Galgaduud

Deegaanka Wabxo ee Gobolka Galgaduud ayaa waxaa saaka ka dhacay dagaal culus oo la isugu adeegsaday hubka noocyadiisa kala duwan, kaasi oo u dhaxeeyay Xoogag u daacad ah Xarakada Al-Shabaab iyo Xisbul Islaam oo isku dhinac ah iyo Xoogag u daacad ah Ahlu Sunna oo ka soo horjeeda.

Mas’uuliyiin u kala hadlay labada dhinac ayaa waxay dagaalkan ka sheegteen guulo, iyadoo dhinac kasta uu sheegayo in uu jebiyay dhinaca ka soo horjeeda.

Afhayeenka Xisbul Islaam Shiikh Muuse Carraale ayaa BBC-da u sheegay in saaka uu dagaal xooggan ka dhacay deegaanka Wabxo, isla markaana Xoogaggooda oo ku sugan meel deegaanka Wabxo bannaankeeda ah ay weerar soo qaadeen sida uu hadalka u yiri kooxo ay Itoobiya soo adeegsatay, wuxuuna intaas ku daray in ay dagaalka ku jebiyeen kooxihii soo weeraray, ayna ka furteen gaadiid dagaal oo ay ku jiraan kuwo gaashaaman iyo hub kale.

Afhayeen kale oo u hadlay Ahlu Sunna Waljamaaca balse ka gaabsaday in magaciisa la sheego ayaa isna u sheegay BBC-da in ay saaka weerar ku soo qaadeen kooxo sida uu hadalka u dhigay islaam la dirir ah, wuxuuna dhinaciisa sheegtay guul ay dagaalka ka gaareen, inkastoo uu carrabka ku dhuftay in uu dagaalka weli socdo

Ma jirto cid labada dhinac ka madax bannaan oo xaqiijineysa xaqiiqada dagaalka ka dhacay Deegaanka Wabxo ee Gobolka Galgaduud.

Wixii ku soo kordha dagaalka Wabxo ka socda kala soco halkan haddii uu Alle idmo